نصائح توعوية عن الـ HIV

الفيروس ده شغال ازاي؟ بص... بيدخل جسمك ويستهدف الخلايا المناعية اللي المفروض تحميك من الامراض. مع الوقت، لو سيبناه من غير علاج، بيضعف جهاز المناعة بتاعك تدريجيا لحد ما يبطل يقدر يحميك من الامراض العادية. بس متقلقش، العلاج بيمنع كل ده.

خليني اقولك الفيروس بيتنقل ازاي بالظبط...

الفيروس ممكن ينتقل في حالتين: ١. لو دم او سوائل جسم شخص عنده الفيروس دخلت في دم شخص تاني (زي مثلا من خلال جرح مفتوح) ٢. من خلال العلاقة الجنسية او مشاركة الحقن

طيب ايه اللي مش بينقل الفيروس خالص؟ - البول - البوس العادي - استخدام نفس الحمام - المصافحة او الحضن - الاكل والشرب مع حد عنده الفيروس

يعني متخافش، الفيروس مش سهل انه ينتقل في التعاملات اليومية العادية.

الموضوع معقد شوية... في ناس ممكن متظهرش عليها اي اعراض خالص، وفي ناس تانية ممكن تظهر عليها اعراض زي:

- حرارة وصداع - تعب شديد وألم في العضلات - طفح في الجلد - التهاب في الحلق

بس المهم تعرف ان الاعراض دي مش دليل اكيد، يعني ممكن تكون عندك الفيروس من غير اي اعراض، او تكون الاعراض دي بسبب حاجة تانية خالص. عشان كده التحليل هو الطريقة الوحيدة للتأكد.

في ٣ انواع من التحاليل:

١. تحليل PCR ده اغلى تحليل وادقهم، بيكشف الفيروس من بدري

٢. تحليل ANTIGEN ده متوسط التكلفة وبيكشف الفيروس بعد فترة اطول

٣. تحليل ANTIBODY ده ارخص تحليل، بس بياخد وقت اطول عشان يبقى دقيق

كل تحليل ليه وقت مختلف للدقة وتكلفة مختلفة، هنشرحهم بالتفصيل تحت

خليني اشرحلك موضوع العلاج...

اولا لازم تفهم ان الفيروس ده له علاج بس ملوش شفاء نهائي. طيب ايه الفرق؟

العلاج عبارة عن ادوية بتاخدها بانتظام، شغلها انها: - توقف نشاط الفيروس في جسمك - تمنعه من التكاثر والانتشار - تخليه غير نشط وبالتالي مش بيسبب مشاكل

لما تنتظم في العلاج، الفيروس بيوصل لمرحلة اسمها 'undetectable' يعني: - مش بيظهر في التحاليل - مش بيسبب اي اعراض - مش بينتقل لشريك حياتك

يعني باختصار: لو اخدت العلاج بانتظام، تقدر تعيش حياة طبيعية تماما زي اي حد. بس لازم تفضل منتظم في العلاج.

خليني اشرحلك المراحل اللي بيمر بيها الفيروس في جسمك...

١. المرحلة الحادة (اول ٦ اسابيع) • بتبدأ من لحظة دخول الفيروس لجسمك • ممكن تظهر اعراض وممكن لا • في الفترة دي مينفعش يتكشف غير بتحليل PCR بس

٢. المرحلة المزمنة (من ٦ اسابيع لحد ٥-١٠ سنين) • دي المرحلة الطويلة • ممكن تظهر علامات ضعف في المناعة زي: - عدوى متكررة - نقص في الوزن - تعب وارهاق - حرارة متقطعة • في الفترة دي ممكن يتكشف بـ: - تحليل PCR - تحليل Antigen - تحليل Antibody

٣. مرحلة الايدز (المرحلة المتقدمة) • بتحصل بعد حوالي ١٠ سنين من غير علاج • المناعة بتبقى ضعيفة جدا • الجسم مش بيقدر يحمي نفسه من اي مرض • بتتكشف بتحليل PCR او Antibody

المهم تفهم ان العلاج المبكر والمنتظم بيمنع الوصول للمرحلة الاخيرة خالص.

خليني اشرحلك كل تحليل بالتفصيل:

١. تحليل PCR • اغلى تحليل (حوالي ٩ آلاف جنيه) • مش متغطي بالتأمين • دقته: - ٥٠٪ بعد ١٠-١٥ يوم - ٩٩٪ بعد ٣٠ يوم

٢. تحليل Antigen • متغطي بالتأمين • تكلفته ٥-٦ آلاف جنيه • دقته: - ٥٠٪ بعد ١٥-٢٠ يوم - ٩٩٪ بعد ٤٥ يوم

٣. تحليل Antibody • متغطي بالتأمين • تكلفته ٥٠٠ جنيه بس • دقته: - ٥٠٪ بعد ٢٠-٣٠ يوم - ٩٩٪ بعد ٣ شهور

نصيحة: اختار التحليل حسب امكانياتك المادية والوقت اللي عدى من التعرض المحتمل للفيروس.

عندك ٣ خيارات لعمل التحاليل:

١. المعامل الحكومية • المعامل المركزية • بتطلب البطاقة • اسعارها معقولة • في بعض المخاوف بخصوص الخصوصية

٢. المعامل الخاصة • مش كلهم بيطلبوا بطاقة • خصوصية اعلى • معمل الفا: بيطلب بطاقة • معمل المختبر: مش بيطلب بطاقة

٣. الجمعيات المتخصصة • موجودة في القاهرة واسكندرية • خصوصية وسرية كاملة • بيقدموا دعم نفسي مع التحليل • اسعار في متناول الجميع

نصيحة: اختار المكان اللي بيديك راحة نفسية وخصوصية.

خليني اوضحلك مخاطر انتقال الفيروس بالتفصيل...

الجنس الشرجي الغير آمن: • خطورة عالية بسبب: - تقطعات مجهرية في المنطقة - كثرة الأوعية الدموية - احتمال الانتقال اعلى من الجنس المهبلي

اسئلة مهمة وإجاباتها:

س: لازم يكون في قذف عشان ينتقل الفيروس؟ ج: لا، الفيروس موجود في السائل المنوي قبل القذف كمان

س: الشخص اللي بيمارس دور فاعل (top) في خطر؟ ج: اه، الخطر اقل بس موجود برضه

س: ممكن ينتقل من خلال: • البوس العادي؟ لا • مشاركة الاكل والشرب؟ لا • لمس الجلد السليم؟ لا • البول؟ لا

ملحوظة مهمة: الخطر بيزيد لو في جروح او قطع في الجلد او الغشاء المخاطي.

هل لو حد عنده الفيروس بس بيتعالج وواخد الادية بانتظام خطر اني امارس معاه؟ لا مش هينقلك حاجة عشان المرض بيبقي في حالة اسمها undetectable او لا يمكن رصده

هل لو واحدة بتاخد الأدوية بتاعتها ومنظمة وعايزة تتجوز وتحمل ينفع؟ اكيد

هل هتنقل لجوزها او البيبي؟ لا، شرط الالتزام بالادوية والمتابعة المستمرة مع الدكتور

الفيروس مرض مزمن علاجه سهل فسيولوجيا صعب نفسيا نتيجة وصمة العار او الشفقة او تهويل الاحداث ان كده نهاية العالم.

السكر والضغط بردو امراض مزمنة تستلزم علاج مدي الحياه بس غير مصحوبة بالوصم فاعشان كده الدنيا اسهل ليهم.

محدش محتاج يعرف انك عندك الفيروس ولا انك بتاخد ادوية غير شراكئك الجنسيين. مش لازم ام او اب او اخ او صديق.

لو نشط جنسيا اعمل تحاليلك واطمن.